हावाबाट पनि कोरोना भाइरस सर्ने बैज्ञानिकको दाबी

एजेन्सी – हावाबाट पनि कोरोना भाइरस सर्न सक्ने दावी बैज्ञानिकहरुले गरेका छन् । ३२ देशका २३९ वैज्ञानिकहरुको एक समूहले आफूहरूले गरेको अनुसन्धानबाट हावामा उड्ने सानो कणबाट पनि कोरोना संक्रमण फैलिन सक्ने प्रमाण भेटेको दाबी गरेको छ ।

द न्युयोर्क टाइम्सका अनुसार ती वैज्ञानिकले विश्व स्वास्थ्य संगठन (डब्लूएचओ) लाई खुला पत्र लेखेर कोरोना भाइरससम्बन्धी मार्गनिर्देश परिमार्जन गर्न माग गरेका छन् ।

डब्लूएचओले भने प्रमुख रूपमा संक्रमित व्यक्तिले हाच्छिउँ गर्दा वा बोल्दा मुखबाट निकाल्ने थुकको छिटा अर्काे व्यक्तिलाई पर्यो भने मात्र उसलाई कोरोना भाइरस सर्ने बताउँदै आएको छ ।

तर ती वैज्ञानिकको दाबी के छ भने संक्रमितले हाच्छिउँ गर्दा हावामा टाढासम्म उछिट्टिने सानो वा ठूलो थुकका छिटा त्यो एउटा कोठामा जहाँसम्म फैलिन सक्छ, त्यहाँ बस्ने सबैलाई संक्रमित गराउने क्षमता राख्छ । तर डब्लूएचओले उनीहरूले पेस गरेको प्रमाण पर्याप्त नरहेको बताएको छ ।