सुदूरपश्चिमका पाँच जिल्ला बाढीको उच्च जोखिममा, चार जिल्लामा मध्यम जोखिम

डोटी,असार ६ – मनसुनी वायुका कारण देशभर वर्षा भइरहेको छ । देशका विभिन्न भागमा भीषण वर्षा हुने सम्भावना रहेको छ ।
बाढी पूर्वानुमान महाशाखाका अनुसार सुदूरपश्चिम प्रदेशका कञ्चनपुर, कैलाली, बाजुरा, बझाङ र दार्चुला गरी पाँच जिल्ला उच्च जोखिम रहेका छन् । डडेल्धुरा, बैतडी, डोटी र अछाममा बाढीको मध्यम जोखिम रहेको छ ।
शनिबार महाकाली नदीको बहाव बढ्ने र त्यस क्षेत्रका मोहना लगायतका सहायक नदीहरुमा पनि पानीको बहाव बढ्न सक्ने महाशाखाले जनाएको छ । महाशाखाले त्यस क्षेत्रका बासिन्दाहरुलाई सतर्क रहन आग्रह गरेको छ ।
त्यस्तै, सेती नदी नगायत अन्य स्याना नदीहरु, खोलाहरुमा बाढी आउन सक्ने र पहाडी जिल्लाहरुमा वर्षातका कारण पहिरो आउन सक्ने भन्दै सजग रहन आग्रह गरिएको छ ।