नेपालमा एकै दिन तीन लाखबढीले लगाए कोरोना विरुद्धको खोप

काठमाडौँ,२९साउन। नेपालमा एकै दिन तीन लाखभन्दा बढीले कोरोना विरुद्धको खोप लगाएका छन्। नेपालमा कोरोना भाइरस विरुद्ध खोप अभियान सुरु भएयता बिहीबार एकै दिन हालसम्मकै धेरै तीन लाखभन्दा बढी खोप लगाएको स्वास्थ्य तथा जनसंख्या राज्यमन्त्री उमेश श्रेष्ठले जनाएका छन्।

शुक्रबार सम्म प्राप्त विवरण अनुसार बिहीबार एकै दिन ३ लाख ९ हजार ६८ जनाले खोप लगाएको उनले ट्वीटरमार्फत् जानकारी दिएका छन्। गत माघ १४ गतेबाट सुरु भएको खोप अभियानलाई पछिल्लो समय सरकारले तिब्र रुपमा अगाडी बढाएको छ। स्वास्थ्य तथा जनसंख्या मन्त्रालयका अनुसार अहिलेसम्म पूर्ण डोज खोप लगाउनेको संख्या २९ लाख नाघिसकेको छ भने पहिलो मात्रा खोप लगाउनेको संख्या ४६ लाख हाराहारी पुगेको छ।