कञ्चनपुरको पुनर्वासका सीमामा विद्युतीय तारबारको माग गर्दै मुख्यमन्त्रीलाई ज्ञापनपत्र

पुनर्वास नगरपालिकामा वर्षेनी जंगली हात्तीको आतंकबाट स्थानीयले भोग्नुपरेको समस्या निराकरण गर्न विद्युतीय फेन्सी तारबारको माग गर्दै सुदुरपश्चिम प्रदेशका मुख्यमन्त्री त्रिलोचन भट्टलाई ज्ञापनपत्र बुझाएको संस्थाका प्रदेश संयोजक मुकुन्द राणाले बताए। 

संस्थाले पुनर्वास नगरपालिकाको सिफारिसमार्फत नगरपालिकाको वडा नम्बर ९ बिचफाटादेखि ७, ८, १० र ११ नम्बर डोकेबजारसम्मको सीमा क्षेत्रमा विद्युतीय फेन्सी तारबारका लागि अनुमानित लागत रकम ७७ लाख ८० हजार बराबर माग गरेको छ। 

मुख्यमन्त्री भट्टलाई ज्ञापनपत्र बुझाउँदै पुनर्वास -९ का वडाध्यक्ष नारायणप्रसाद जैशीले जंगली हात्तीलाई रोक्न नेपाली भूमीमा विद्युतीय तारबार लगाउँदा भारतीय एसएसबीले ज्यादती गर्दै तारबार फालेको बताए। आफूहरुको बारम्बारको संघर्षका विषयमा सरकार बेखबर हुँदा सो समस्या अहिलेसम्म ज्युको त्यु रहेको उनले बताए।

ज्ञापनपत्रमा प्रदेशको वन तथा वातावरण मन्त्रालय, आर्थिक मामिला तथा योजना मन्त्रालय र भौतिक तथा पुर्वाधार विकास मन्त्रालयलाई बोधार्थ गरिएको छ।