डीएसएलमा दीपक बोहराको उत्कृष्ट बलिङ : ४ ओभरमा १ मेडनसहित ८ रन, ५ विकेट  

धनगढी ११ जेठ -

धनगढी सुपर लिगमा छैटौँ दिनको खेल जारी रहँदा दीपक बोहरा उत्कृष्ट लयमा देखिएका छन् । लिटल फ्लावर क्रीकेट क्लबबाट खेलिरहेका बोहराले देउखुरी वारियर्स क्रीकेट क्लब दाङ विरुद्धको खेलमा उत्कृष्ट बलिङ गरेका हुन् । बुधवारको पहिलो खेलमा पावर प्लेमै देउखुरीका ५ महत्त्वपूर्ण ब्याट्सम्यानलाई आउट गर्दै लिटल फ्लावरलाई उनले उत्कृष्ट सुरुवात दिलाए ।  

धनगढी स्थित प्रदेश प्रहरीको खेलमैदानमा जारी प्रतियोगितामा देउखुरी वारियर्सले टस जितेर ब्याटिङ गर्ने निर्णय गरेको थियो । खेलको पहिलो ओभर १ रनमा विकेट विहीन रहँदा दोस्रो ओभरमा आएका बोहराले प्रज्वल थापालाई १ र देउखुरीका कप्तान विशाल विक्रम केसीलाई ४ रनमा बोल्ड आउट गरे । त्यसपछि चौथो ओभरमा आएका बोहराले वसन्त सिंह कार्कीलाई शून्य रनमा बोल्ड गरिदिए । उनैले व्यक्तिगत अन्तिम र खेलको छैटौँ ओभरमा विराट भण्डारीलाई १ रनमा बोल्ड आउट र नारायण जोशीलाई शून्य रनमै क्याच आउट गराउँदै उत्कृष्ट सुरुवात दिलाएका हुन् । उसका कौशल रुपाखेतीले ३ र प्रकाश जैसी तथा सन्दीप खत्रीले १/१ विकेट लिए । 

लिटल फ्लावरको उत्कृष्ट बलिङ पछि देउखुरी १५.२ ओभरमा ६० रनमै अल आउट हुन पुगेको छ । ६१ रनको विजयी लक्ष्य पछ्याएर उसले जवाफी ब्याटिङ थालेको छ ।