घरबेटीलाई कुलमानको चेतावनी, 'बहालमा बस्नेसँग विद्युत्‌‌को बढी शुल्क नलिनु'

काठमाडौँ — नेपाल विद्युत् प्राधिकरणका कार्यकारी निर्देशक कुलमान घिसिङले घरबेटीहरुलाई बहालमा बस्नेसँग विद्युत्‌को बढी शुल्क नलिन चेतावनी दिएका छन् । प्राधिकरणको कार्यकारी निर्देशकमा नियुक्त भएको तीन वर्ष पुगेको अवसरमा आयोजना गरेको पत्रकार सम्मेलनमा घरबेटीहरुले बहालमा बस्नेसँग प्रतिनियुनिट शुल्क बढी लिने गरेको गुनासो आएपछि घिसिङले यस्तो टिप्पणी गरेका हुन् ।

‘घरबेटीले विद्युत्‌को व्यापार गर्न मिल्दैन,’ उनले भने, ‘लिएको भेटिए प्राधिकणले हस्तक्षेप गर्न अवस्था आउन सक्छ ।’ उनले बहालमा बस्नेसँग कति भाडा लिने प्राधिकरणको क्षेत्राधिकार नभए पनि विद्युत्‌को बढी शुल्क लिए प्राधिकरणले कदम चाल्न सक्ने बताए ।
प्राधिकरणले ग्रार्हस्थ ग्राहकसँग उनीहरुले खपत् गर्ने विद्युत्‌को परिणमअनुसार फरक फरक शुल्क लिने गरेको छ । प्राधिकरणका अनुसार २० युनिटसम्म विद्युत् खरिद गर्ने ग्राहकलाई प्रतियुनिट ३ रुपैयाँ र थप ३० रुपैयाँ सेवा शुल्क लिने गरिएको छ । त्यो भन्दा बढी विद्युत् खपत गर्ने ग्राहकलाई सोहीअनुसार दर फरक फरक तोकिएको छ । प्राधिकरणले ग्रार्हस्थ ग्राहकसँग लिने प्रतियुनिट शुल्क बढीमा १३ रुपैयाँसम्म छ ।

घिसिङले आयोजना गरेको पत्रकार सम्मेलनमा घरबेटीले बहालमा बस्नेसँग प्रतियूनिट १५ रुपैयाँभन्दा विद्युत् बापत् शुल्क लिने गरेको गुनासो आएको थियो ।