४ दिन अघि भारतको पन्जाबबाट फर्किएर क्वारेन्टाइनमा बसेकी बैतडीकी एक युवतीको मृत्यु

बैतडी, जेठ २० - बैतडीमा क्वारेन्टाइनमा बसेकी एक युवतीको मृत्यु भएको छ । जिल्लाको पुर्चौडी नगरपालिका ४ भटनास्थित मालिका माध्यमिक विद्यालयको क्वारेन्टाइनमा बसेकी भटनाकै २२ वर्षीय सुनिता लुहारको मङ्गलवार बिहान मृत्यु भएको हो ।
मृतक लुहार मुटु रोगको बिरामी रहेको भटना स्वास्थ्यचौकी इन्चार्ज रोहित कुमार धानुकले बताए। लुहारको अवस्था हिजो सामान्य रहे पनि आज बिहानै मृत्यु भएको उनको भनाई छ ।

मृतक लुहार जेठ १६ गते गौरिफण्टा नाकाबाट हुँदै भारतको पन्जाबबाट स्वदेश फर्किएको बताइएको छ । उनी १८ गतेदेखि श्रीमान् र १८ महिने बच्चासहित क्वारेन्टाइनमा बसिरहेकी थिइन् । 

मृतको स्वाब सङ्कलन गर्ने तयारी भइरहेको छ भने पोस्टमार्टम कोरोना परीक्षणपछि मात्रै गरिने जिल्ला स्वास्थ्य कार्यालय बैतडीले जानकारी दिएको छ ।