लुधियानाबाट चोरिएको सुन र पैसा सहित ४ जना पक्राउ

धनगढी, जेठ ३१ - 

प्रहरीले सुनका गरगहना र नगद रकम सहित ४ जनालाई पक्राउ गरेको छ । भारतको लुधियाना पन्जाब स्थित गुरुदेव नगरबाट चोरिएका सुनका गरगहना र झन्डै साढे तीन लाख नगद सहित कैलालीका २ र कञ्चनपुरका २ जनालाई उनीहरूको घरबाटै प्रहरीले पक्राउ गरेको हो ।

पक्राउ पर्नेमा कैलालीको गोदावरी नगरपालिकाका योगेन्द्र बिक, गौरिगंगा नगरपालिकाका कुमार भुल, कञ्चनपुरको कृष्णपुर नगरपालिकाका मानबहादुर कार्की र सोही ठाउँका सन्तोष भट्टराई रहेका छन् । वैशाख २८ गते चोरेर फरार रहेका उनीहरूलाई सुदूरपश्चिम प्रदेश प्रहरी कार्यालय र कैलाली बिहीबार पक्राउ गरेको हो ।

प्रहरीले उनीहरूको साथबाट २७ ग्राम ५ सय ३० मिलिग्राम सुनको एक थान सिक्री, ८ ग्राम ८० मिलिग्राम सुनको एक थान औँठी, १ ग्राम ४ सय मिलिग्राम सुन लगायतका गहना र १ लाख ४७ हजार ५ सय भारतीय रुपैयाँ, ९२ हजार ५ सय नेपाली रुपैयाँ, १ सय ३० अमेरिकन डलर, हंगेरीको ५ सय नगद रकम बरामद गरिएको जिल्ला प्रहरी कार्यालय कैलालीका प्रहरी प्रमुख, प्रहरी उपरीक्षक सुदीप गिरीले बताए ।

आपसी सल्लाहमा गुरुदेव नगरका नन्द किशोरको घरमा काम गर्दै आएका मशेश विकसँग सल्लाह गरी उनीहरू उक्त रकम र सुनका गहना चोर्न सफल भएका थिए ।

नन्द किशोरले नेपाल आएर घरबाट सुन र हिराका गरगहना र नगद चोरी गरेको सूचना प्रहरीलाई दिएका थिए । सोही सूचनाका आधारमा उनीहरूलाई पक्राउ गरिएको प्रहरी उपरीक्षक गिरीले बताए । चोरीमा संलग्न केही व्यक्ति फरार रहेको प्रहरीले जनाएको छ ।

नन्द किशोरले प्रहरीमा बुझाएको विवरण अनुसार थुप्रै सुन र हिराका गहना अझै फेला पर्न नसकेको प्रहरीले जनाएको छ ।