८ मिनेटको फाइट सिनमा ७० करोड खर्च ! (भिडियो सहित)

एजेन्सी, मुम्बई, साउन १ - 

'बाहुबली' सिरिजबाट आफ्नो लोकप्रियतालाई चुलीमा लगेका प्रभास स्टारर नयाँ सिनेमा 'साहो' रिलिजको क्रममा रहेको छ।

'बाहुबली' जस्तो भब्य सिनेमामा काम गरेका प्रभासको 'साहो' घोषणा भएदेखि नै चर्चामा छ। बाहुबलीजस्तै बिग बजेटको सिनेमाको हालै रिलिज भएको टिजरले सिनेमा हलिउड शैलीमा बनाइएको देखाएको छ।

यस्तैमा सिनेमाको ८ मिनेट लामो फाइटको दृश्यका लागि खर्च भएको रकम सुन्दा सिनेमाले 'बाहुबली'बाट प्राप्त चर्चालाई थप गर्ने देखाएको छ।

समाचारमा अनुसार ८ मिनेटको सो दृश्य खिच्न लगभग बलिउडको एउटा हाइबजेट सिनेमा बनाउन लाग्ने पैसा खर्च गरिएको छ। सो दृश्य खिच्न ७० करोड भारू खर्च भएको दाबी छ।

भारतीय मिडियाहरूले सिनेमाका सिनेम्याटोग्राफरको हवाला दिदैं उक्त समाचार लेखेका हुन्। आबुधावीमा खिचिएको सो एक्सन दृश्यका लागि ७० करोड भारू खर्च भएको छ।

यस सिनेमाको एक्सन सम्पूर्णरूपमा हलिउडको एक्सन समूहले कोरियोग्राफ गरेको हो।

कुनै पनि भारतीय सिनेमाको एक्सनका लागि खर्च गरिएको यो रकम आजसम्मकै ठूलो धनराशी हो।

प्रभासको साथमा श्रद्धा कपुर, चंकी पाण्डे, महेश मांजेकर, अरूण विजय तथा मुरली शर्मा आदिको मूख्य भूमिका रहेको सिनेमा १५ अगस्टमा रिलिज हुँदैछ।

सुजिथको निर्देशनमा बनेको सिनेमा बनाउन कुल ३०० करोड भारू रकम खर्च भएको बताइन्छ। सिनेमा हिन्दी, तमिल तथा तेलेगु भाषामा रिलिज हुनेछ। यो सिनेमा एकैसाथ यी ३ भाषामा खिचिएको हो।

'बाहुबली' पछि प्रभास अभिनित पहिलो सिनेमा भएकाले पनि दर्शकहरूका लागि यो सिनेमा विशेष प्रतिक्षित सिनेमा बनेको छ।