बझाङमा पुल निर्माण अलपत्र

September 15, 10:21

बझाङ, भदौ २९ । सेती लोकमार्ग अन्तर्गत बझाङको खप्तडछान्ना गाउँपालिकामा निर्माणाधीन तीन वटा पक्की पुलको निर्माण कार्य अलपत्र परेको छ। निर्माण (ठेकेदार) कम्पनीको लापरबाहीका कारण सम्झौता भएको पाँच वर्ष बितिसक्दा पनि पुल निर्माण हुन सकेका छैनन्। 

सेती लोकमार्ग दक्षिणी खण्ड आयोजना कार्यालय अछामले २०७५ सालमा बोलपत्र आह्वान गरेर निर्माण कार्य सुरु गरेको थियो। सम्झौतापछि निर्माणको काम सुरुवात गर्न ठेकेदार कम्पनीले ढिला सुस्ती गरेका कारण तीनवटै पुलको निर्माण रोकिएको हो।  

खप्तडछान्ना गाउँपालिका– १, जाडारमा छ करोड ५० हजार लागतमा खाम्पा टिडिआर जेभी, खप्तडछान्ना गाउँपालिका–२,  कुचेखोला (कालिपछाई) रायमाझी केराभान जेभीले पाँच करोड र खप्तडछान्ना गाउँपालिका–७, बिडिगाडमा अम्भर कन्स्ट्रक्सनले पाँच करोडको लागतमा पुल निर्माणको ठेक्का सम्झौता गरेको थियो। 

स्थानीय सरकार तथा सेवाग्राहीले पुल निर्माण छिटो गर्न ताकिता गरे पनि ठेकेदार कम्पनीले कुनै वास्ता गरेको छैन। पुल समयमै पूरा हुन नसक्दा स्थानीयले अनावश्यक दुःख खेप्नु परेको छ भने दैनिक उपभोग्य वस्तुको आयातमा समेत समस्या छ। 

खप्तडछान्ना गाउँपालिकाका उपाध्यक्ष विष्णुकुमार थापाले ठेकेदार कम्पनीले पुल निर्माण कार्यमा ढिला सुस्ती गरेको बताउनुभयो। पालिकाबाट समेत पटक पटक ताकेता गरेपछि सेती लोकमार्ग कार्यालयबाट ठेकेदारलाई दबाब परेको थियो। 

२०७८ साल असोज ३१ गतेदेखि कात्तिक ३ गतेसम्म आएको बेमौसमी बाढीका कारण कुचेखोलामा रहेको पक्की पुल एकातिर गाड अर्कोतिर भएर समस्यासमेत भएको छ। बाढीले निर्माण सामग्री र निर्माणस्थल नै बगाएर लिएपछि निर्माण कार्य ढिला भएको ठेकेदार कम्पनीले जनाएको छ। 

ठेकेदारहरूले काम लिने र निर्माण कार्य ढिला गर्ने परिपाटीले गर्दा पनि यस्तो समस्या हुने गरेको स्थानीयवासी ईश्वर जोशीले बताउनुभयो। निर्माण सुरु भएको पाँच वर्षसम्म पनि पुल नबनेपछि तमैलबाट पैदल हिँडेर आवतजावत गर्नु परिरहेको छ। सेती लोकमार्ग सडक दक्षिणी खण्ड कार्यालय प्रमुख रमेश भण्डारीले सुरुवातमा ठेकेदार कम्पनीले ढिलाइ गरे पनि पछि कोरोना भाइरसको महामारी र बाढीलगायतका समस्याले निर्माण कार्यमा ढिलाइ भएको बताउनुभयो। 

जडार र कुचे खोलाको पक्की पुलको वारिपारिका पिल्लर तयार गरिएका छन् भने ढलानलगायतका अधिकांश काम गर्न अझै बाँकी छ। बिडिगाड पक्की पुलमा भने ढलान भइसकेको भए पनि कमसल सामग्री राखिएको भन्दै सेती लोकमार्ग दक्षिणी खण्ड कार्यालयले पुनः निर्माण गर्न निर्देशन दिएको छ।   

सम्बन्धित वर्गका समाचारहरू

जन्म दिनको अवसरमा उप मेयर रावलद्धारा अस्पतालका विरामीलाई फलफुल…
डोटी ।  जन्म दिनको अवसरमा रमाईलो गरेर फजुल खर्च गर्ने परिपाटीको एक पछि अर्कोगरी विस्तारै अन्त्य… विस्तृतमा
विकास बजेट खर्च न्यून
धनगढी । चालु आर्थिक वर्षको आधाभन्दा बढी समय गुज्रिँदासम्म प्रदेशको विकास बजेट (पुँजीगत बजेट) खर्च… विस्तृतमा
पक्की पुलमा एक पटक एउटा गाडी
बाजुरा । बाजुराको साँफे–मार्तडी राजमार्ग अन्तर्गत पर्ने गुइगाड खोलामा निर्माण भएको नयाँ पक्की पुलमा… विस्तृतमा
कञ्चनपुरको दक्षिणी क्षेत्र : सधै बाघको त्रास
कञ्चनपुर / गत वर्ष चैतमा कञ्चनपुरको पुर्नवास सँग सीमा जोडिएको भारतमा पर्ने दुधुवा नेशनल पार्कमा… विस्तृतमा