कश्मिरको आतंकवाद विरोधी युनिटमा यसरी तैनाथ भए धोनी

कश्मिर - भारतीय क्रिकेट टोलीका पूर्व कप्तान महेन्द्र सिहं धोनी बुधवारबाट कश्मिरमा आतंकवाद विरोधी युनिटमा तैनाथ भएका छन्।

भारतीय सेनाको मानार्थ लेफ्टिनेन्ट कर्णेल रहेका धोनी भिक्टर फोर्स अन्तर्गतको बटालियनमा रहेर १५ दिनसम्म कश्मीरमा खट्ने भएका हुन्। सो बटालियनमा करिब ७ सय सैनिक रहेका छन्। धोनी रहने ब्यारेकमा भने उनीसँगै ५० देखि ६० जनासम्म सैनिक रहनेछन्।

त्यहाँ तैनाथ रहँदा धोनीसँग ३ वटा बन्दुकका साथै बुलेटप्रुफ ज्याकेट रहेनछ। धोनीले त्यहाँ रहँदा प्याट्रोलिङ गर्नुका साथै गार्ड र पोस्ट ड्युटीको जिम्मेवारी निर्वाह गर्नेछन्।

यी सबै जिम्मेवारीहरु धोनीकै आग्रहमा निश्चित गरिएको हो। सेनाले धोनीले कश्मिरमा तैनाथ हुनुपूर्व प्यारा ट्रुपको प्रशिक्षण लिनुका साथै एयरक्राफ्टबाट हामफाल्ने प्रशिक्षण पूरा गरिसेको जनाएको छ।

कश्मिरमा १५ दिन बिताएपछि धोनीफ थप प्रशिक्षणका लागि सैन्य क्याम्पमा जानेछन्।