काम नगर्ने सुदूरपश्चिमका २ ठेकेदार कालो सूचीमा

धनगढी, 
मङ्सिर १० – 
सार्वजनिक खरिद अनुगमनको कार्यालयले तोकिएको समयमा काम नगर्ने सुदूरपश्चिमका २ ठेकेदारलाई कालोसूचीमा राखेको छ । 
सार्वजनिक खरिद अनुगमनको कार्यालयका अनुसार स्वास्थ्य निर्देशनालय राजपुर डोटीको  सिफारिसमा तिवारी मेडिसिन डिष्ट्रिब्युटर धनगढीलाई २ वर्ष कालो सूचीमा राखिएको छ ।
नेपाली सेनाको सङ्ग्राम शार्दूल गुल्म बझाङको सिफारिसमा श्रीकृष्ण कन्स्ट्रक्सन र त्याडी निर्माण सेवा जेभी बझाङलाई १ वर्ष कालो सूचीमा राखिएको छ

सार्वजनिक खरिद अनुगमनको कार्यालयले तोकिएको समयमा काम नगर्ने अन्य २ वटा ठेकेदार कम्पनीलाई पनि कालो सूचीमा राखेको छ ।
सार्वजनिक खरिद नियमावलीको दफा ६३ को उपदफा १ बमोजिम तोकिएको समयमा काम गर्ने र सम्झौतामा उल्लेख भएअनुसारको काम नगर्ने ठेकेदारलाई विभिन्न सार्वजनिक निकायको सिफारिसमा कालो सूचीमा राखिएको  कार्यालयले जनाएको छ ।
सार्वजनिक खरिद ऐनमा काममा ढिलाइ गर्ने या सम्झौताअनुसारको काम नगर्ने ठेकेदार कम्पनीलाई १ देखि ३ वर्षसम्म कालो सूचीमा राख्ने व्यवस्था छ ।
सार्वजनिक खरिद अनुगमनको कार्यालयका अनुसार पोखरा महानगरपालिकाको सिफारिसमा श्री होराइजन विल्डर्स पोखरालाई एक वर्ष कालोसूचीमा राखिएको छ भने सशस्त्र प्रहरी बल केन्द्रीय कार्यालयको सिफारिसमा श्री ओम श्री ओम इन्टरप्राइजेज मिनभवन काठमाण्डौलाई १ वर्ष कालो सूचीमा राखिएको सार्वजनिक खरिद अनुगमनको कार्यालय ताहाचल काठमाण्डौले जनाएको छ ।