विश्व नेपाली साहित्य महोत्सवको तयारी अन्तिम चरणमा

धनगढी, १० फागुन – कैलालीको धनगढीमा फागुन १४ गतेबाट आयोजना हुने विश्व नेपाली साहित्य महोत्सवको तयारी अन्तिम चरणमा पुगेको छ । आयोजक सुदूरपश्चिमाञ्चल साहित्य समाजले आज धनगढीमा पत्रकार सम्मेलनको आयोजना गर्दै महोत्सवको तयारी अन्तिम चरणमा रहेको जानकारी दिएको हो । समाजका अध्यक्ष रामलाल जोशीले अतिथिहरूको आगमन सँगै भौतिकरुपमा कार्यक्रमको तयारी अन्तिम चरणमा पुगेको जानकारी गराउनु भयो । महोत्सवको फागुन १४ गते राष्ट्रपति विद्यादेवी भण्डारीले उद्घाटन गर्नुहुने उहाँले बताउनु भयो ।

पत्रकार सम्मेलनमा महोत्सवका संयोजक यज्ञराज उपाध्यायले नेपाली भाषाको जननीका रूपमा रहेको सुदूरपश्चिमको पहिचानलाई विश्वभर चिनाउनका लागि महोत्सवको आयोजना गरिएको बताउनु भयो ।
कार्यक्रममा १ सय भन्दा बढी नेपाली भाषी तथा नेपाली भाषाको उत्थानमा लागिपरेका साहित्यकारहरूको सहभागिता रहने छ । साथै नेपाली साहित्य र कला क्षेत्रका सबै विशिष्ट व्यक्तिहरूलाई कार्यक्रममा निमन्त्रणा गरिएको उहाँको भनाई छ ।
पत्रकार सम्मेलनमा महोत्सवको लोगो समेत सार्वजनिक गरिएको छ ।