डोटीमा पहिरोमा पुरिएर एक शिशुको मृत्यु, ४ जना भागेर बाँचे, आमाको अवस्था गम्भीर 

डोटी, असार २१ – डोटीमा पहिरोमा पुरिएर एक शिशुको ज्यान गएको छ। आइतबार बिहान जिल्लाको पूर्वी चौकी गाउँपालिका–४ साना गाउँको नुवाकोट टोल बस्ने भक्त नेपालीका ६ महिने छोरा छत्र नेपालीको पहिरोले च्यापिएर ज्यान गएको हो । पहिरोमा परि मृतक शिशुकी आमा २५ बर्सिया देवा नेपाली गम्भीर घाइते भएकी छन् । मृतक बालकको शव पोस्टमार्टमका लागि जिल्ला अस्पताल डोटीमा ल्याइएको जिल्ला प्रहरी कार्यालय डोटीले जानकारी दिएको छ ।

त्यस्तै गम्भीर घाइते आमालाई उपचारका लागि पनि डोटी अस्पतालमा ल्याइएको छ । पहिरो आएको समयमा घरभित्र भक्त नेपालीका श्रीमती दुई छोरा र एक छोरी गरी ५ जना रहेकोमा अरू भने भागेर बाँच्न सफल भएका छन् । पहिरोले घरभित्रको सबै सरसामान पूर्ण रूपमा क्षति भएको स्थानीयले बताएका छन् ।