गजल : दाताहरूले सके जति दिइरहे, जस अपजस भनेनन्

गजल

दाताहरूले सके जति दिइरहे, जस अपजस भनेनन्
आफ्नो सम्पत्तिको गणनामा प्लस माइनस  भनेनन्
 
छोराले तपाईँको सम्पत्ति एक रत्ती चाहिन्न भन्यो 
बुवाले  छोरालाई   कहिल्यै तँ चाहिन्नस  भनेनन्

जसलाई  शीर र पिठ्युँमा बसाएको हुँ सकी–नसकी 
आज  उनैले आँगन छेउको, ढिकसम्म बस भनेनन्

ठुलाबडाले छोरी सानो छँदा दुवैलाई दलित मानेको हो
हाल बुवा दलित नै छन् तर छोरीसँगको लसपस भनेनन् 

किताबका हजारौँ प्रश्न सोध्दै तथानाम गालीले सरापे
तर आजसम्म मेरा गुरुले बाबु त के जान्दछस् भनेनन् ।

वेद भट्ट