'नेपाल आइडल ४' को निर्णायकमा शम्भूजित बास्कोटा, सुगम पोखरेल र शिवानी मोक्तान

काठमाडौं : 'नेपाल आइडल’का निर्णायक परिवर्तन भएका छन्। फ्रेन्चाइज गायन रियालिटी शो नेपाल आइडलले चौथो सीजनका लागि निर्णायकहरु परिवर्तन गरेको हो।

नयाँ सिजनको निर्णायकमा वरिष्ठ संगितकार शम्भूजित बास्कोटा, गायक सुगम पोखरेल र शिवानी मोक्तान अनुबन्धित भएका छन्।

निर्णायकमा अनुबन्धित भएसँगै नेपाल आइडलमा जजको रुपमा देखिने सपना पुरा भएको बास्कोटाले बताए। गायक पोखरेलले पनि नेपाल आइडलसँग सहकार्य गर्न पाउँदा आफू खुशी भएको सुनाए।

'नेपाल आइडलमा आउँछु भन्ने थियो, जुर्दो रहेछ। हिजो पनि नेपाल आइडल राम्रोसँग संचालन भएको थियो। हिजोका जजहरुले राम्रो काम गर्नुभएको छ, व्यवस्थापनले पनि राम्रो किसिमको माहोल सिर्जना गरिदिएको छ, नेपाल आइडल परिवारको सदस्य भएर काम गर्न पाएँदा खुशी छु' मोक्तानले बताइन्।

नेपाल आइडल सीजन ४ मा तीन जना निर्णायकसहित मोडेल रेश्मा घिमिरे पनि जोडिएकी छिन्। उनी आसिफ शाहसँगै होस्टका रुपमा देखिँदैछिन्।

यसअघिका तीनै सिजनमा न्ह्यु ब्रजाचार्य, कालीप्रसाद बाँस्कोटा र इन्दिरा जोशी निर्णायकको रुपमा रहेका थिए। उनीहरु सबैजना नयाँ शो को निर्णायकको रुपमा अनुबन्धित भएका कारण नयाँ निर्णायक टिम चयन गरिएको 'नेपाल आइडल' का निर्देशक सुरेश पौडेलले जानकारी दिए।