यस बर्षको मनिराज वाङ्मय पुरस्कार साहित्यकार सुवेदीलाई

धनगढी, असार १ -

यस वर्षको मनिराज वाङ्मय पुरस्कार वरिष्ठ साहित्यकार दधिराज सुवेदीलाई प्रदान गरिने भएको छ । महाकाव्यकार मनिराज जोशीका छोरा गोविन्दराजले स्थापना गरेको मनिराज वाङ्मय पुरस्कार विराटनगरमा रहेर साहित्यमा सक्रिय वरिष्ठ साहित्यकार दधिराज सुवेदीलाई प्रदान गरिने नेपाली साहित्य तथा संस्कृति प्रतिष्ठान गोदावरी (कैलाली) का अध्यक्ष पदमराज जोशीले आज आयोजित पत्रकार सम्मेलनमा जानकारी दिएका हुन् । 
भाषा विज्ञ एवं साहित्यकार डिल्लीराज फुलाराको संयोजकत्वमा गठन भएको तीन सदस्यीय समितिले गरेको सिफारिसानुसार सुवेदीलाई रु एक लाख पुरस्कार राशिको उक्त पुरस्कार दिने निर्णय गरिएको प्रतिष्ठानले जनाएको छ । 
गत वर्ष उक्त पुरस्कार राष्ट्रकवि माधव प्रशाद घिमिरेलाई प्रदान गरिएको थियो ।