धनुषाको गोदार चोक तनावग्रस्त, प्रहरीले रबरको गोली र अश्रु ग्यास प्रहार गर्‍यो

धनुषा : पूर्व–पश्चिम राजमार्गअन्तर्गत धनुषाको गणेशमान चारनाथ नगरपालिका ८ गाेदारमा राजमार्ग बन्द गरी बसेका डा. सीके राउत नेतृत्वकाे जनमत पार्टी नेपालका कार्यकर्तामाथि प्रहरीले गोली चलाएको छ ।

आज आइतवार बिहानैदेखि सडक बन्द गरी बसेका जनमत पार्टीका कार्यकर्तामाथि प्रहरीले ११ राउन्ड रबरको गोली र १६ राउन्ड अश्रु ग्यास प्रहार गरेको धनुषाका प्रहरी प्रवक्ता जितेन्द्र बस्नेतले जानकारी दिनुभयो ।

केही समय प्रहरी र जनमत पार्टीका कार्यकर्ताबीच झडपसमेत भएको थियाे । झडपका क्रममा नेपाल प्रहरीका सात, सशस्त्र प्रहरीका एक र पाँच जना आन्दोलनकारी घाइते भएका छन् । घाइतेको प्रादेशिक अस्पताल जनकपुरधामा उपचार चलिरहेको छ ।

बिहानैदेखि बन्द रहेको पूर्व–पश्चिम राजमार्ग भने अहिले सञ्चालनमा आएको छ । अहिले त्यस क्षेत्रकाे सुरक्षा व्यवस्था कडा पारिएको छ । किसानलाई समयमै मल खाद्य उपलब्ध गराउनुपर्ने लगायतका माग राख्दै जनमत पार्टीले गएको पुस १५ गतेदेखि मधेशका जिल्लामा पर्ने पूर्व–पश्चिम राजमार्गमा चक्काजाम गर्दै आएका छन् ।