म सधैं कप्तान बन्न आएको होइन : ज्ञानेन्द्र मल्ल

काठमाडौं  २० पुस  / राष्ट्रिय क्रिकेट टिमका निवर्तमान कप्तान ज्ञानेन्द्र मल्लले आफू सधैँभर कप्तान बन्नुपर्छ भन्ने मान्यतामा नरहेको बताएका छन् ।

मंगलबार कीर्तिपुरस्थित त्रिवि क्रिकेट मैदानमा चलिरहेको बन्द प्रशिक्षणमा सहभागी भएका उनले सञ्चारकर्मीहरुसँग संक्षिप्त प्रतिक्रिया दिँदै आफू कप्तान हुँदा वा नहुँदा पनि राष्ट्रका लागि खेल्ने बताए ।
‘म सधैँभरि कप्तान बन्नुपर्छ भनेर आएको होइन र हुनुपर्छ भन्ने पनि होइन । म पहिला पनि खेलिरहेको थिएँ र अहिले पनि खेल्छु । देशका लागि खेल्छु, मेरो लागि खेल्छु, परिवारको लागि खेल्छु । त्यो नै मुख्य उद्देश्य हो’ ज्ञानेन्द्रले भने ।

नेपाल क्रिकेट संघ ९क्यान० संग विवादित विषयमा सहमति भएपछि पूर्वकप्तान ज्ञानेन्द्रसहित ९ खेलाडी मंगलबार बन्द प्रशिक्षणमा उपस्थित भएका हुन् ।

ज्ञानेन्द्रले क्यानसँग आफूहरुको विवाद नभएको तर केही विषयमा असन्तुष्टि रहेको बताए । ‘विवाद भन्दा पनि एउटा असन्तुष्टि हो, विवादजस्तो बनाइयो । खेलाडीहरुको एक - दुईवटा कुरामा असन्तुष्टि थियो’ मल्लले भने, ‘अब धेरै पनि समय छैन । हाम्रो मुख्य लक्ष्य भनेको विश्वकप खेल्ने हो ।’

मल्लले आफूलाई कप्तानबाट हटाउँदा दुस्ख लागेको तर यसलाई विवादको विषय नबनाउने बताए । ‘पहिला त कप्तानबाट हट्दा दुस्ख लाग्यो । यत्रो वर्ष क्रिकेटलाई दियौं र विना कारण विभिन्न कुरा निकालेर जसरी ९क्यानले कारबाही० गर्नुभयो त्यसले व्यक्तिगत रुपमा गाह्रो भएको थियो । मैले बोर्डको विपक्षमा जाने, बोर्डलाई निचो गराउने कहिले पनि गरेको छैन । त्यो गर्ने भए हामी अरु पनि बाटो अपनाउँथ्यौं होला । खेल्दैनथ्यौं होला’ मल्लले भने ।

आफूहरुले धेरै वर्षसम्म कुनै सेवा सुविधाविना खेलेको भन्दै मल्लले अहिले आफ्नो आत्मसम्मानमा चोट पुगेको बताए । ‘यो कुरा सम्बोधन हुनुपर्‍यो भन्दा अरु अरु आरोप लगाउँदा दुस्ख लाग्यो । यो आत्मसम्मानको कुराले मलाई अफ्ट्यारो परेको थियो । तर जीवनमा जसरी पनि अगाडि बढ्नुपर्छ’ मल्लले भने ।

निवर्तमान कप्तान मल्लले आफूहरु प्रशिक्षणमा आइसकेकाले विवादका विषयलाई बाहिर राखेर मिलेर खेल्ने बताए । ‘अब सबै कुराहरु बाहिर राखेर नेपाली क्रिकेटको लागि र भविष्यका लागि हामी सबै एक ठाउँ बसेर अघि बढ्नुपर्छ । महत्वपूर्ण प्रतियोगिता आएको छ । त्यसका लागि भए पनि एकजुट हुनुपर्छ’ उनले भने ।

क्यानले सन् २०२२ को पहिलो ६ महिनाका लागि गरेको खेलाडी वर्गीकरणमा असन्तुष्टि जनाएका तत्कालिन तत्कालिन कप्तान ज्ञानेन्द्र मल्ल, दिपेन्द्र सिंह ऐरी खेलाडीहरु सोमपाल कामी र कमल सिंह ऐरीलाई क्यानले सेन्ट्र्ल कन्ट्र्याक्टबाट हटाएको थियो । त्यस्तै मल्ल र ऐरीको कप्तान र उपकप्तान पद पनि खोसेर सन्दीप लामिछानेलाई कप्तानको जिम्मेवारी दिएको थियो ।

यही विषयलाई लिएर खेलाडीहरुले आफूहरु ब्याट र बल छाड्नुपर्ने स्थिति आउने बताएका थिए । तर क्यानसँगको सहमतिपछि उनीहरु प्रशिक्षणमा फर्किएका छन् ।