रोपाई गर्दै गर्दा चट्याङ लागेर कञ्चनपुरका तीन जनको मृत्यु, एक घाइते 

कैलाली - अविरल वर्षासँगै परेको चट्याङका कारण कैलाली कञ्चनपुरमा तीन जनको मृत्यु भएको छ । एक जना घाइते भएका छन् । कञ्चनपुरको पुनर्वास नगरपालिकामा खेतमा काम गर्दै गरेका एक जनको र कैलालीको गोदावरी नगरपालिका–३ माला खेतीमा रोपाइँ गरिरहेका कञ्चनपुरको कृष्णपुरका एक जनाको मृत्यु भएको हो । 

चट्याङमा परि कञ्चनपुरको पुनर्वास नगरपालिका–६ टाउन बजार प्रतिभा नगरका देवेन्द्र श्रेष्ठको मृत्यु भएको प्रहरीले जानकारी दिएको छ । श्रेष्ठको खेतमा काम गर्दै गर्दा चट्याङमा परि घटनास्थलमै मृत्यु भएको इलाका प्रहरी कार्यालय पुनर्वासका प्रमुख प्रहरी निरीक्षक नरेशराज मल्लले बताए । त्यस्तै पुनर्वास नगरपालिका–८ मा चट्याङ लागेर  सालिभान थापाकी श्रीमती शारदा थापाको मृत्यु भएको उनले बताए । खेतमा काम गर्दागर्दै चट्याङ लागेर मृत्यु भएको मल्लको भनाई छ ।

कैलालीको गोदावरी नगरपालिका–३ माला खेतीमा रहेको रेडियण्ट ग्यास कम्पनीको जमिनमा रोपाई गर्दै गर्दा कञ्चनपुर कृष्णपुर नगरपालिका–५ बस्ने पुनराम चौधरीको मृत्यु भएको प्रहरीले जानकारी दिएको छ । मृतक तीनै जनाको घटना मुचुल्का गरी पोस्टमार्टमका लागि सेती प्रादेशिक अस्पताल धनगढी पठाउने तयारी भइरहेको प्रहरीले जानकारी दिएको छ । यसै गरी चट्याङ लागेर कञ्चनपुरको बेलौरी नगरपालिका–९ की बजलिया राना घाइते भएकी छिन् । उनको इसान अस्पताल गुलरियामा उपचार भइरहेको प्रहरीले जानकारी दिएको छ ।