काँग्रेस नेता जोशीको समन्वयमा मसुरिया स्वास्थ्य चौकीलाई ह्विलचियर हस्तान्तरण

धनगढी २९ असार – कैलालीको मसुरिया स्वास्थ्य चौकीलाई दुई थान ह्विलचियर हस्तान्तरण गरिएको छ । नेपाली काँग्रेसका नेता तथा समाजसेवी दिनेश राज जोशीको समन्वयमा ह्विलचियर स्वास्थ्य चौकीलाई प्रदान गरिएको थियो । एलआर आई स्कुल काठमाडौँका फाउन्डर यशोधरा पन्त द्वारा आफ्नो सासू आमा श्री राधा देवी पन्त तथा स्वर्गीय आमाबुवा पीताम्बर जानकी जोशीको नाममा ह्विलचियर प्रदान गरिएको हो ।

मसुरिया स्वास्थ्य चौकीमा अति असक्त बिरामी तथा गर्भवती सुत्केरी महिलालाई स्याहारसुसार गर्न ह्विलचियरको अभावसँगै समस्या परेको हुँदा गौरीगङ्गा नगरपालिका वडा नं–९ का निवर्तमान वडा अध्यक्ष हरि प्रसाद तिवारीको आग्रहलाई दाता समक्ष राखे पछि पन्तले स्व. आफन्तहरूको स्मृति सम्मानमा ह्विलचियर प्रदान गरेको जोशीले जानकारी दिए । ह्विलचियर मसुरिया स्वास्थ्य चौकी व्यवस्थापन समितिका उपाध्यक्ष चन्द्रकला पराजुली तथा स्वास्थ्य चौकी प्रमुख लालप्रसाद पन्तलाई हस्तान्तरण गरिएको छ ।