खेलाडीको प्रोत्साहनका लागि आदर्श–१ का वडाध्यक्ष खड्काले ३० हजार सहयोग गर्ने

डोटी - डोटीको आदर्श गाउँपालिका–१ का वडाध्यक्ष भरतबहादुर खड्काले भलिबल खेलाडीलाई आर्थिक सहयोग गर्ने घोषणा गरेका छन् । डोटीलाई लगातार दुई वटा प्रदेश स्तरीय भलिबल प्रतियोगितामा उपाधि जिताउन महत्त्वपूर्ण भूमिकामा रहेका खेलाडी जनक खड्का लाई ३० हजार आर्थिक सहयोग गर्ने वडाध्यक्ष खड्काले घोषणा गर्नु भएको हो । 

जनक खड्काको कप्तानीमा गत वर्ष धनगढीमा सम्पन्न प्रथम प्रदेश स्तरीय भलिबल प्रतियोगितामा डोटीले २५ वर्ष लामो उपाधि खडेरी तोड्दै प्रथम स्थान हासिल गरेको थियो । पोखरामा आयोजना हुन लागेको नवौँ राष्ट्रिय खेलकुद प्रतियोगिताको सुदूरपश्चिम छनौटमा पनि डोटीले स्वर्ण जित्दा उनी नै मुख्य भूमिकामा थिए । प्रादेशिक छनौटमा पहिलो रोजाइमै परेका खड्का सुदूरपश्चिमको कप्तानी सम्हाल्दै नवौँ राष्ट्रिय खेलकुदमा सहभागी बन्ने छन् । 

उनको आर्थिक सहयोगका लागि प्रादेशिक छनौटमा उपाधि जितेको सम्मान तथा प्रोत्साहनका स्वरूप वडाध्यक्ष खड्काले आर्थिक सहयोगको घोषणा गरेका हुन् ।