देउवा निवासमा झल्कियो सामाजिक सद्भाव, डेउडामा झुमे सबै

धनगढी,०७ भदौ । पूर्वप्रधानमन्त्री एवं नेपाली कांग्रेसका सभापति शेरबहादुर देउवाको धनगढीस्थित निवासमा सामाजिक सद्भाव झल्किने गरी गौरा पर्व मनाइएको छ। मंगलबारका दिन गौराको प्रतिमूर्ति भित्र्याइएको देउवा निवासमा बिहीबारका दिन भने धुमधामका साथ गौराको पूजा गरिएको हो।

कांग्रेस केन्द्रीय सदस्य तथा सांसद डा। आरजु राणा देउवाले बिहीबार बिहान धनगढी उत्तरबेहडीस्थित आफ्नो निवासमा गौराको विधिवत पूजा गरेकी हुन्। जहाँ हरेक वर्ग समुदायका महिलाहरूको सहभागिता रहेको थियो।

गौरामा थारु समुदायको उपस्तिथिले सामाजिक सद्भाव थप झल्किएको हो। थारु समुदाय महिलाहरू पनि डेउडा झुमेका थिए। उनीहरूले आफ्नै पहिरन लगाएर डेउडा खेलेका थिए।

प्रतिनिधिसभा सदस्य आरजुले पनि डेउडा खेलेकी थिइन्। डेउडामा सुदूरपश्‍चिम प्रदेश सरकारका उद्योग, पर्यटन, वन तथा वातावरण मन्त्रालयका राज्यमन्त्री गीतादेवी माल पनि सहभागी थिइन्। धनगढी उत्तरबेहडीस्थित देउवा निवासमा महिला–पुरुष सबैले डेउडा खेलेका थिए।