रामारोशनमा पर्यटकलाई प्रवेश अनुमति दिन स्थानीयको माग 

अछाम। विदेशी नागरिकलाई पर्यटकीय स्थल रामारोशन प्रवेशको अनुमतिका लागि स्थानीयले आग्रह गरेका छन्। रामारोशन गाउँपालिकाका अध्यक्ष मानबहादुर साउदको अगुवाइमा भएको सर्वपक्षीय बैठकले विदेशीलाई एक महिनासम्मका लागि अनुमति दिन माग गरेका हुन्।

अन्तर्राष्ट्रिय सम्मेलनमा सहभागी हुने नाममा अछाम भित्रिएका विदेशी नागरिक स्थानीय प्रशासनको अनुमति नभएका कारण बिच बाटोमै रोकिएका छन् । ‘वल्र्ड रेन्वो फेमिली’ नामक संस्थाले सेप्टेम्बर १५ देखि अक्टोबर १५ सम्मका लागि रामारोशनमा कार्यक्रम सञ्चालन गर्न अनुमति मागेको थियो ।

प्राकृतिक तथा भौगोलिक वातावरणमा प्रतिकूल असर नगर्ने, सामाजिक रूपमा प्रतिकूल असर नपार्ने र भिसा अवधि थपसहित रामारोशन जमघट कार्यक्रमका लागि गृह मन्त्रालयसँग अनुमतिका लागि आग्रह गर्ने निर्णय गरिएको स्थानीयवासीले जनाएका छन् । 

यस्तै सङ्घीय पर्यटन मन्त्रालय, सुदूरपश्चिमको मुख्यमन्त्री तथा मन्त्रीपरिषद् कार्यालय, उद्योग, पर्यटन वन तथा वातावरण मन्त्रालय, जिल्ला प्रशासन, डिभिजन वन कार्यालयलाई पनि पत्रचार गरी विदेशी नागरिकलाई रामारोशनमा एक महिनाको अवधिसम्म रहन दिने अनुमतिका लागि अनुरोध गरिएको छ।

गाउँपालिका अध्यक्ष, कार्यपालिका सदस्य, स्थानीय राजनीतिक दल, रामारोशन पर्यटन विकास समिति र रोकारवालाको संयुक्त बैठकले विदेशीले प्रतिकूल असर नपर्ने दाबीसहित गाउँपालिकाले नै पत्र लेखेको छ । विदेशी नागरिकलाई रामारोशनमा आउन सहज बनाउनका लागि पनि अनुरोध गरिएको छ। पर्यटकीय क्षेत्र रामारोशनमा विदेशी नागरिक आउँदा यहाँको पर्यटन विकासमा टेवा पुग्ने गाउँपालिका अध्यक्ष मानबहादुर साउदको भनाइ छ।

गृह मन्त्रालयबाट विदेशी नागरिकलाई कार्यक्रम सञ्चालनको अनुमति आएमा रोकिएका विदेशी रामारोशन जान पाउने बताइएको छ । तर अछामका प्रमुख जिल्ला अधिकारी शरदकुमार पोखरेल अन्तर्राष्ट्रिय सम्मेलन भनिएको कार्यक्रम गर्ने दिने वा नदिने विषयमा आफूलाई निर्देशन भए अनुसार काम गर्ने बताए। रामारोशन आउँदै गरेका विदेशी नागरिकलाई अछामको चौखुट्टे, रामारोशन क्षेत्रमा सुरक्षा दिएर राखिएको उनले बताए।

आधिकारिकताको अभावमा अछाम प्रवेशको पश्चिमी नाका चौखुट्टेमा १२६ जना विदेशी रोकिएका छन्। रामारोशन क्षेत्रमा पुगेका ५४ जना र पूर्वी नाका बेलखेतमा आठ जना रोकिएको बताइएको छ। एक महिनासम्म सञ्चालन हुने कार्यक्रमका विषयमा स्थानीय तह, स्थानीय प्रशासन र प्रदेश सरकार अनविज्ञ रहेको बताइएको छ। रामारोशनमा आयोजना हुने भनिएको उक्त कार्यक्रमको विस्तृत विवरण कहीँ कतैबाट पनि प्राप्त हुन नसक्दा चार दिनदेखि विदेशी नागरिक अछामका विभिन्न स्थानमा अन्योलमा परेका छन्। सरकारको अनुमतिबिना नै रामारोशनमा एक महिनासम्म विदेशीले कार्यक्रम गर्ने भनेपछि स्थानीय प्रशासनले आधिकारिकता खोजेको छ ।