सुदूरपश्चिममा आज भुवा पर्व बिदा 

धनगढी  ।  सुदूरपश्चिम प्रदेश सरकारले आज बिहीबार सार्वजनिक बिदा दिएको छ । सुदूरपश्चिमवासीको मौलिक पर्व भूवाका अवसरमा सार्वजनिक बिदा दिइएको हो । यस प्रदेशमा भुवा पर्व धुमधामका साथ मनाउने प्रचलन छ ।

भुवा पर्व सुदूरपश्चिममा दशैंतिहारपछिको दोस्रो ठूलो पर्वका रूपमा मनाउने गरिएको छ । पौराणिक कालमा कौरवमाथि पाण्डवले विजय प्राप्त गरेको दिनको सम्झनामा यो पर्व मनाइन्छ ।  

महिनाको चतुर्दशी तथा औंसीको अघिल्लो रातबाट दाउराका मुडा बालेर भुवा पर्व सुरु गरिन्छ । भुवा पर्वलाई भस्सो पनि भन्ने चलन छ । दौरा सुरुवालमा सजिएर हातमा ढाल तरबार लिएर दमाहाको बाजामा भुवा खेल खेलिन्छ । यस अवसरमा गाउँभरिका मान्छे एक ठाउँमा जम्मा हुने, रमाइलो गर्ने र राति धुनी जगाउन काठका ठूला ठूला मुडा बाल्ने चलन छ ।

विशेषगरी बाजुरामा मनाइने भुवा पर्व पछिल्ला वर्षमा प्रदेश राजधानी धनगढीमा पनि मनाइँदै आएको छ । यस वर्ष बाजुरेली सेवा समाजले बिहीबारदेखि धनगढीमा प्रतियोगितात्मक भुवा चाली खेलको पनि आयोजना गर्न लागेको समितिका सचिव भरत केसीले बताए । ‘भुवा पर्वको धार्मिक तथा सांस्कृतिक महत्वलाई थप उजागर गर्न तीन दिने प्रतियोगितात्मक खेलको आयोजना गरेका हौं,’ केसीले भने ‘भुवा पर्वलाई धुमधामसँग मनाउन धनगढीस्थित कभर्डहलमा देउडासहितका विभिन्न कार्यक्रम राखेका छौं ।’