कञ्चनपुरमा एक लाख बढी नगदसहित १० जुवाडे पक्राउ

असोज २९
कञ्चनपुर -
कञ्चनपुरको दोधाराचाँदनी झोलुङ्गेपुल छेउमै रहेको एक होटेलबाट १० जुवाडे पक्राउ परेका छन । ईलाका प्रहरी कार्यालय दोधाराका इन्चार्ज प्रहरी निरीक्षक चेतराम पनेरुले महाकाली नगरपालिका–४ को रिर्भर साइड होटेलबाट जुहाडे पक्राउ गरिएको बताए ।

प्रहरी निरीक्षक पनेरुका अनुसार उक्त होटलमा राति जुवातास खेलिरहेकै अवस्थामा ईप्रकाको टोलीले पक्राउ गरेको हो । प्रहरीले जुहाडेसहित एक लाख, तीन हजार पाँच सय ६ रुपैयाँसमेत बरामद गरेको छ ।

पक्राउ परेका १० जना ईलाका प्रहरी कार्यालय दोधाराको नियन्त्रणमा रहेका छन । कञ्चनपुर प्रहरीले जुवा खालबाट पक्राउ परेका व्यक्तिको नाम भने सार्वजनिक गरेको छैन । खेल्ने र खेलाउने विरुद्ध कारबाही प्रकृया अघि बढेको प्रहरीले जनाएको छ ।