क्वारेन्टाइन नामका मृत्यु केन्द्रमा फेरि सुदूरपश्चिमका दुई युवकको मृत्यु

धनगढी, जेठ २५ - सुदूरपश्चिममा भारतबाट फर्केर क्वारेन्टाइनमा बसेका दुई युवकको मृत्यु भएको छ । 

डोटीको केआईसिंह गाउँपालिका वडा नम्बर ३ बासुदेबीमा ७ दिन अघि भारतबाट फर्किएर क्वारेन्टिनमा बसेका एक १९ वर्षीय युवकको मृत्यु भएको हो।

स्वास्थ्य कार्यालय डोटीका कोभिड–१९ सम्पर्क व्यक्ति सुर्यबहादुर विष्टले उनको आज बिहान सिताराम आधारभुत विद्यालयको क्वारेन्टिमा मृत्यु भएको बताए। युवक ७ दिन पहिले भारतको लुधियानाबाट फर्किएका थिए।
उनको कोरोना परीक्षणका लागि थ्रोट स्वाबको नमूना संकलन गरेर परीक्षणका लागि आजै धनगढी पठाउने तयारी रहेको उनको भनाइ छ ।

यता बैतडीको क्वारेन्टाइनमा पनि एक युवकको मृत्यु भएको छ । शनिबारनै भारतबाट बैतडी पुगेर पाटन नगरपालिका ६ स्थित भीमदत्त प्राविधिक शिक्षालयको क्वारेन्टाइनमा बसेको पाटन ६ सन्तोली घर भएका ३१ बर्षीय पुरुषको ज्यान गएको पाटन नगरपालिकाका स्वास्थ्य शाखा प्रमुख मदनसिंह महराले जानकारी दिएका छन ।
महराले उनी शनिबार बिहान मात्रै भारतको बेंगलोरबाट पाटन आइपुगेका र साँझ ६ बजेतिर बेहोस भएपछि उपचारकै क्रममा राति मृत्यु भएको बताए । उनको स्वाब संकलन गरि परीक्षणका लागी धनगढी पठाइसकेको उनले जानकारी दिए ।