बैतडीमा ट्रक दुर्घटना हुँदा डोटीका एक जनाको मृत्यु, एकको अवस्था गम्भीर

बैतडी, असार १३ – जयपृथ्वीराजमार्ग अन्र्तगत बैतडीको खोडपे – बझाङ सडकखण्डको धारीमा शनिबार बेलुका १० चक्के ट्रक दुर्घटना एकजनाको मृत्यु भएको छ । मृत्यु हुनेमा ट्रकका सहचालक डोटीको जोरायल गाउँपालिका २ बुडरका २० बर्षीय भुवन सुब्बा रहेका छन् । 
यस्तै ट्रकका चालक कैलालीको गोदावरी नगरपालिका मालाखेतीका ३० बर्षीय लवकुमार तामाङ गम्भीर घाइते भएका घटनास्थलमा खटिएका प्रहरीचौकी खोड्पेका प्रहरी सहायक निरीक्षक रामदत्त भट्टले जानकारी दिए । सहचालक सुब्बाको घटनास्थलमै मृत्यु भएको हो । घाइते तामाङलाई उपचारका लागि डडेल्धुरा अस्पताल पठाइएको छ भने मृतकको शव परिक्षणका पाटन प्राथमिक स्वास्थ्य केन्द्र पठाईएको छ ।

दाङबाट सिमेन्ट बोकेर बझाङतर्फ गईरहेको ना ६ ख ४४५० नम्बरको १० चक्के ट्रक जयपृथ्वीराजमार्ग अन्तर्गत पाटन नगरपालिका ८ धारीमा शनिबार बेलुका साढे ५ बजे दुर्घटनामा परेको हो ।
ट्रक सडकबाट ४ सय मिटर तल खसेको प्रहरीले जनाएको छ । ट्रकमा चालक र सहचालक मात्रै रहेका थिए । स्टेरिङ फेल भएर र्दुघटना भएको हुनसक्ने प्रहरीको प्रारम्भिक अनमान रहेको छ ।