बैतडीमा मृत्यु भएका क्वारेन्टाइनमा खाना पकाउने भान्सेको शव कोरोना रिपोर्ट नआउँदै जलाइयो

बैतडी, असार १५ – बैतडीमा घर गएपछि मृत्यु भएका क्वारेन्टाइनमा खान पकाउने भान्सेको कोरोना परीक्षणको रिपोर्ट नआउँदै दाहसंस्कार गरिएको छ।
जिल्लाको दशरथ चन्द नगरपालिका वडा नम्बर ६ का ५३ वर्षीय पुरुषको शनिवार बिहान स्वास्थ्यमा समस्या आएपछि अस्पताल लैजाने क्रममा मृत्यु भएको थियो।

जिल्ला प्रहरी कार्यालय बैतडीका प्रहरी नायव उपरीक्षक नारायण प्रसाद अधिकारीका अनुसार उनी विगत २ महिनादेखि बैतडीको दशरथ चन्द नगरपालिका वडा नम्बर ४ मा रहेको जगन्नाथ बहूमुखी क्याम्पसको क्वारेन्टाइनमा खाना पकाउने काम गर्दै आएका थिए। तर, गत असार ५ गतेदेखि उनी क्वारेन्टाइनबाट घर गएका थिए।

दशरथ चन्द नगरपालिकाका स्वास्थ्य शाखा प्रमुख दुर्गा दत्त जोशीले परिवारको आग्रहमा  उनको आइतबार दाहसंस्कार गरिएको जानकारी दिए। उनको धार्मिक मान्यता अनुसार परम्परागत रूपमै स्थानीयले आफैँ दाहसंस्कार गरेका हुन्।

उनको स्वाब भने शनिवार राती मात्रै धनगढी पठाएको थियो। उच्च स्वास्थ्य सतर्कताका साथ उनको दाहसंस्कार गरिएको जोशीको भनाइ छ।