साँफे–मार्तडी सडकखण्ड अझै खुलेन

बाजुराः
साँफे–मार्तडी सडकखण्ड अझै अवरुद्ध छ । बाजुराको मुख्यसडक मानिएको साँफे मार्तडी सडकखण्ड अवरुद्ध बनेको करिब १ साता पुग्न लाग्दा समेत नखुलेको पाइएको हो ।
लगातारको वर्षापछि साँफे–मार्तडी सडकखण्ड अन्त्रगत बुढीगंगा नगरपालिका– बल्देमा पहिरो जाँदा उक्त सडक करिब १ साता अघिदेखि अवरुद्ध बनेको जिल्ला प्रहरी कार्यालय बाजुराले जनाएको छ ।
बर्षायाममा साँफे–मार्तडी सडकखण्ड पटक–पटक अवरुद्ध हुने भएकाले सडक डिभिजन कार्यालय अछामले पुर्व तयारीका साथ उक्त सडकखण्डमा स्काभेटर राखेको भएपनि निरन्तरको वर्षापछिको पहिरोले अवरुद्ध सडक झन् अवरुद्ध बन्दै गएको जिल्ला प्रहरी कार्यालय बाजुराका सुचना अधिकारी धनदेव साँउदले जानकारी दिए ।उनका अनुसार साँफे–मार्तडी सडकखण्डको बल्देमा अहिले पनि स्काभेटरद्धारा पहिरो हटाउने काम भैरहेको भएपनि पुनः ठाउँ–ठाँउमा पहिरो खस्ने भएकाले सडक संचालनमा आउन नसकेको र स्काभेटरले पहिरो पन्छाउने काम भैरहेकाले केही दिनमा सडक संचालनमा आउने बताइएको छ ।
बाजुराको मुख्य सडकखण्ड मानिएको साँफे–मार्तडी सडक पटक–पटक अवरुद्ध भैरहँदा पनि त्यसको बैकल्पिक सडक संचालनका लागि सरोकारवाला निकाय मौन रहेको पाइएको छ, भने व्यापारीले सास्ती र उपभोक्ताले मार खेपीरहनु पर्ने कुरा पनि बाजुराका लागि नौलो होइन ।