दार्चुला घटनाको विरोधमा बैतडीमा प्रदर्शन

बैतडी: दार्चुलाको महाकाली नदीमा जयसिंह धामी बेपत्ता भएको घटनालाई लिएर नेपाल कम्युनिस्ट पार्टी पाटन नगरकमिटीले बिरोध प्रदर्शन गरेको छ। सोमबार दिउँसो संगठनले भारतीय ज्यादती बढेको भन्दै त्यसको विरोधमा पाटन बजारमा बिरोध प्रदर्शन गरेको हो।

देशैभर बिरोध प्रदर्शनमा उत्रिएको पार्टीको कार्यक्रम अनुरूप नगरकमिटीले पनि प्रदर्शन गर्दै महाकाली नदीमा बेपत्ता भएको विषयमा तत्काल छानविन गरी दोषीलाई हदैसम्मको कारबाहीको माग गरेको छ। 

प्रदर्शनकारीहरूले प्रर्दशनमा ‘भारतीय साम्राज्यवाद मुर्दाबाद, सिमानामा भारतीय ज्यादती बन्द गर, नेपाल र नेपाली माथिको हत्या हिंसा बन्द गर’ लगायतका नारा लेखिएका ‘प्लेकार्ड’ बोकेका थिए ।

साउन १५ गते दार्चुलाको व्यास गाउँपालिका–२ का ३३ वर्षीय धामी भारत भएर सदरमुकाम फर्कने क्रममा महाकालीमा बेपत्ता भएका थिए। जयसिंह चढेको तुइन भारतीय सीमा सुरक्षा बल(एसएसबी) का जवानहरूले काटिदिएपछि उनी नदीमा खसेर बेपत्ता भएको स्थानीयले आरोप लगाएका छन्।