दुई साता अघि काठमाडौँबाट फर्किएका एक युवकसहित बझाङका थप ६ जनामा कोरोना पुष्टि

बझाङ, जेठ २४ – बझाङको खप्तड छान्ना गाउँपालिकामा ६ जनामा कोरोना सङ्क्रमण पुष्टि भएको छ। यो सँगै बझाङमा सङ्क्रमितको सङ्ख्या सात पुगेको छ।
कोरोना पुष्टि हुनेमा २५, ३८, ५७ र ७० वर्षीय पुरुष तथा दुई जना ४० बर्सिया महिला छन्। उनीहरूमध्ये पाँच जना भारतको दिल्लीबाट एक हप्ता अगाडि धनगढीस्थित त्रिनगर भन्सार नाका भएर आएको र एक जना २५ वर्षीय पुरुष दुई हप्ताअघि काठमाडौँबाट बझाङ भित्रिएको जिल्ला अस्पताल बझाङका कोरोना फोकल पर्सन डाक्टर मिलन खड्काले बताए।
सङ्क्रमितलाई खप्तड छान्ना गाउँपालिकाले नै बनाएको आइसोलेसनमा राखिएको छ। उनीहरूको स्वास्थ्य अवस्था भने सामान्य नै रहेको डाक्टर खड्काले बताए।