तिन  दिनमा खुल्यो वडा कार्यालयको ताला 

डोटी,असार ४– 
पूर्वीचौकी गाउँपालिका–५ काँडामाण्डौको वडा कार्यालयमा ताला लगाईएको तिन दिन पछि आज ताला खोली कार्यालय सञ्चालनमा आएको वडा अध्यक्ष पदम बहादुर धानुकले जानकारी दिएका छन  । 
खेल मैदान निर्माणमा एकलौटी उपभोक्ता समिति बनाएर अनुपयुक्त ठाउँमा निर्माण गर्न लागेको भन्दै स्थानीयहरुले ताला लगाएका थिए । गाउँपालिका स्तरिय खेल मैदान निर्माणका लागि ३० लाख बजेट विनियोजन गरिएको छ । गाउँपालिकाको क्रमागत योजनामा रहेको उक्त खेल मैदान निर्माणमा विवाद सिर्जना भएपछि स्थानीयले काम रोक्न माग गर्दै ताला लगाइएको नेपाली कांग्रेसका वडा सभापति खडक साउदले बताए । विवादको समाधान नभएकोले अहिले मेसिन रोकिएको छ ।
विवाद समाधान पछि मात्रै काम सुरु गर्नु पर्ने, उपभोक्ता समितिमा हेरफेर गर्नु पर्ने र सबैलाई पाएक पर्ने ठाउँमा मैदान निर्माण गर्नु पर्ने माग राख्दै स्थानीय युवाहरुले बीहिबार देखि ताला लगाएको स्थानीय युवा रतन थापाले बताए । गाउँपालिकाका अध्यक्षको अध्यक्षता बैठक बसेर विवाद समाधान गर्नु पर्ने स्थानीयको माग छ ।
खेल मैदान सामुदायीक वनमा निर्माण हुँदै छ । एकलौटी उपभोक्ता समिति बनाएर वडा कार्यालयको सिफारिस विना विवादका बीच खेल मैदान निर्माण गर्न लागिएको स्थानीयको आरोप छ । गाउँपालिकाका अध्यक्षको पाएक पर्ने गाउँ नजिक खेल मैदान बनाउन लागेको भन्दै अन्य गाउँका युवाहरु विरोधमा उत्रिएका हुन् ।
खेल मैदान सबैको पाएक पर्ने काडामाण्डौं मावि वा सोही नजिकको सामुदायक वनमा बनाउँनु पर्नेमा गाउँपालिका अध्यक्षको गाउँ नजिकको वनमा बनाएको भन्दै स्थानीयले ताला लगाएको वडा अध्यक्ष पदम बहादुर धानुकले बताए । उपभोक्त समिति र निर्माण स्थलका विषयमा विवाद भएपछि आफुले वडाबाट सिफारिस नदिएको उनले बताए । विवाद समाधान पछि निर्माण कार्य गर्नु पर्ने भए पनि एउटा उभोक्ता समितिले काम सुरु गरिसकेको वडाध्यक्ष धानुकले बताए ।
असार मसान्त सकिनै लाग्दा गाउँपालिकाले हतारमा उक्त योजनाको सुरुवात गरेको छ । निर्माण कार्य सुरु गरेको ४÷५ दिन मात्रै भएको छ । असार मसान्तको केही दिन भित्रै ३० लाख वजेट सक्ने गरेर भएको उक्त काम पारदर्शी हुनेमा स्थानीयले शंका गरेका छन् ।
उता गाउँपालिका अध्यक्षले आफुलाई विवादको वारेमा पुर्ण रुपमा जानकारी नभएको र खेलमैदान बनाउन लाई गाउँपालिका भित्र अरु राम्रो जग्गा नभएका कारण सोही ठाउँमा निर्माण हुन लागेको गाउँपालिका अध्यक्ष दिर्घराज बोगटीले खप्तड अनलाईनलाई जानकारी दिएका छन ।