डोटीमा निषेधाज्ञा १० दिन थप भयो, जोर बिजोर प्रणालीबाट सवारी चल्ने

डोटी,असार ९ ः डोटी जिल्लामा जारी निषेधाज्ञा १० दिन थप गरिएको छ । बुधवार बसेको जिल्ला कोभिड संकट व्यवस्थापन केन्द्र डोटीको बैठकले जिल्लामा कोभिड सङ्क्रमित दर केहि मात्रामा घटेको भए पनि सङ्क्रमणको जोखिम कायमै रहेकाले निशेधाज्ञा असार २० गते सम्म लम्ब्याउने निर्णय गरेको छ ।
निषेधाज्ञा थप गरिएको भए पनि केही सहज बनाईएको छ । जिल्लाभित्र सार्वजनिक सवारी साधन जोर बिजोर रुपमा सञ्चालन गर्न पाईने भएको छ । स्वास्थ्य सुरक्षा सम्बन्धि मापदण्डको पालना गरि पसलहरु बिहान ६ बजे देखी १२ बजेसम्म र बेलुका ४ बजेदेखी ८ बजेसम्म खोल्न पाईने भएको छ । होटेल, रेष्टुडेन्ट, चियानास्ता पसलले पनि बिहान ८ बजेदेखी साँझ ८ बजेसम्म होम डेलिभरीबाट सेवा दिन पाउँने भएका छन् ।
त्यस्तै सरकारी तथा सार्वजनिक कार्यालयहरु, बैंक तथा वित्तीय संस्थाहरु, गैर सरकारी संघ संस्थाहरुलाई न्युनतम कर्मचारीको उपश्थितिमा सेवा दिन प्रमुख जिल्ला अधिकारी सुनिल खनालद्धारा हस्ताक्षिरित बिज्ञप्तिमा भनिएको छ । शैक्षिक संस्थाहरु, प्रशिक्षण केन्द्रहरु, साँस्कृतिक गतिविधिहरु जस्ता कार्यहरु भौतिक उपस्थितिमा गर्न भने नपाईने भएको छ ।
डोटी जिल्लामा निषेधाज्ञाको समय थप गरिएको यो छैँटौै पटक हो । बैशाख २१ गते राति १२ बजे देखी लागु भएको निषेधाज्ञा जिल्लामा जारी छ । यो भन्दा अगाडी थपिएको निषेधाज्ञाको समय बिहिवार राति १२ बजे सकिदै छ । निशेधाज्ञाको पालना नगरेमा कडा कार्बाही गरिने प्रमुख जिल्ला अधिकारी सुनिल खनालले बताएका छन् ।