सुदूरपश्चिम सभा सचिवालयको भवन मर्मतमा अनियमितता भएको भन्दै अख्तियारमा उजुरी

धनगढी। सुदूरपश्चिम प्रदेश सभा सचिवालयको भवन मर्मतमा अनियमितता भएको भन्दै अख्तियारमा उजुरी परेको छ। सचिवालयको भवन मर्मतमा अनियमितता गरिएको भन्दै अख्तियार दुरुपयोग अनुसन्धान आयोग महेन्द्रनगरमा उजुरी परेको हो ।

प्रदेश सभा सचिवालय रहेको धनगढीस्थित साविकको जिल्ला विकास समितिको भवन मर्मत तथा रंगरोगनमा जथाभावी खर्च गरी अनियमितता भएको आरोप छ। प्रदेश सभा सचिवालयले भवन मर्मत कार्यमा अनियमितता गरेको भन्दै परेको उजुरीमाथि छानविन भइरहेको अख्तियार दुरुपयोग अनुसन्धान आयोग महेन्द्रनगरका सूचना अधिकारी बसन्त शाहीले बताए।

‘प्रदेश सभा सचिवालयले प्रयोग गरिरहेको साविक जिविसको पूरानो भवन मर्मत र रंगरोगनको कार्यमा अनियमितता भएको भन्दै उजुरी परेको थियो,’ शाहीले भने, ‘उजुरीमाथि छानविन भइरहेको छ । स्थगत रुपमा प्राविधिक नापजाँच पनि गरिएको छ ।’ अख्तियारको प्राविधिक टोलीले हालै धनगढी आएर प्रदेश सभा सचिवालयले मर्मत सम्भार गरेको भवनको स्थगत रुपमा प्राविधिक नाप, जाँच गरेर फर्किएको थियो। अख्तियारले उक्त कार्यसँग सम्बन्धीत कागजपत्र भने यसअघि नै नियन्त्रणमा लिएर छानविन गरेको थियो ।