भिडियो कन्फ्रेन्स मार्फत मुख्यमन्त्रीले लिए सुदूरपश्चिमका नौ जिल्ल्लाको जानकारी

धनगढी, चैत्र १८ – सुदूरपश्चिमका मुख्यमन्त्री त्रिलोचन भट्टले भिडियो कन्फ्रेन्सबाट प्रदेशका नौवटै जिल्लाको अवस्था बारे जानकारी लिइरहेका छन ।
कोरोना भाइरसका कारण उत्पन्न परिस्थिति बारे प्रमुख जिल्ला अधिकारी, जिल्ला समन्वय समितिका प्रमुख, जिल्लाका स्वास्थ्य कार्यालयका प्रमुख लगायतसंग उनले भिडियो कन्फ्रेन्सबाट जानकारी लिएका हुन ।

मुख्यन्त्रीले क्वारेन्टाइनमा बस्नेहरुको अवस्था, खाद्यान्न लगायतका दैनिक उपभोग्य वस्तु मौज्दात रहे नरहेको वारेमा पनि चाँसो राखेका थिए । सो अवसरमा सीमा क्षेत्रमा अलपत्र परेका नेपालीको अवस्था वारे पनि मुख्यमन्त्री भट्टले जानकारी लिएका थिए । विभिन्न जिल्लाका प्रमुख जिल्ला अधिकारी र स्वास्थ्यका अधिकारीहरुले स्वास्थ्यकर्मीले प्रयोग गर्ने सामाग्री, विभिन्न खालका औषधि र खाद्यान्नको अभाव हुन थालेको बताएका थिए ।

छलफलमा प्रदेश सरकारका प्रवक्ता तथा आन्तरिक मामिला तथा कानूनमन्त्री प्रकाश शाह, सामाजिक विकासमन्त्री कृष्णराज सुवेदीको पनि सहभागिता छ । कैलालीबाट धनगढी उपमहानगरपालिकाका प्रमुख नृप वड, प्रमुख जिल्ला अधिकारी यज्ञराज वोहरा लगायतको पनि सहभागिता रहेको थियो ।